La Edá Media n’Asturies trescurre ente l’esbarrumbe del estáu visigodu y la conquista musulmana posterior (711-714 d. C.), y la constitución del Principáu d’Asturies y la creación y afitamientu de la Xunta Xeneral del Principáu como organismu de gobiernu, alministración y mediación ente los conceyos y la Corona, afitamientu que va dase nel reináu de los Reis Católicos.

El conocimientu d’esta etapa histórica básase n’abondes fontes documentales, sobre manera a partir del sieglu XI, na epigrafía y numismática, y tamién na arqueoloxía.

El desarrollu de l’arqueoloxía aplicada al estudiu de la Edá Media ye un procesu de va relativamente poco, estimuláu en parte pola entrada en vigor de la Llei 16/85 del Patrimoniu Históricu Español, que mandaba facer escavaciones o siguimientos arqueolóxicos pa les munches intervenciones restauradores llevaes a cabu n’edificios medievales. Estos trabayos permitieron precisar fases constructives, usos d’edificios o estancies, o formes d’ocupación y esplotación del territoriu, amás de dexar recuperar materiales contestualizables arqueolóxicamente.

La etapa de transición de la tardoantigüedá a la Edá Media ta representada en xacimientos como’l d’Argandenes o la villa romana de Veranes y la so ocupación medieval posterior. Pa l’Alta Edad Media, n’Asturies cuntamos con un conxuntu escepcional d’edificios y xacimientos, que configuren la nomada Arquitectura Asturiana, siendo relevantes los trabayos arqueolóxicos llevaos a cabu en Santa María de Naranco, San Miguel de Lliño, San Pedro de Nora, Santuyano, Santu Adriano de Tuñón o nel propiu recintu de la Catedral d’Uviéu. 

Son tamién mui destacaes les informaciones obteníes de los trabayos nel castiellu de Curiel y nel castiellu de Gauzón, sobre manera polo que fai al papel d’estes fortificaciones en cuantes a control, dominiu y organización territorial na Edad Media.

Pal estudiu de la época pleno y baxo medieval fueron mui importantes los estudios llevaos a cabu en conxuntos monásticos, sobre manera Courias, pero tamién Corniana o Vilanova d’Ozcos, mesmo que los siguimientos d’obres y intervenciones nel ámbitu urbanu y en cascos históricos, como’l casu d’Avilés, Llanes, Grau y Uviéu.

Hai que reseñar tamién les actuaciones nel ámbitu rural en dos llugares d’orixe medieval, en Villanueva (Santu Adrianu) y Vigaña (Balmonte de Miranda).