La Edá de Fierro manifiéstase nel patrimoniu arqueolóxicu asturianu fundamentalmente al traviés de los poblaos fortificaos, conocíos como castros. El fenómenu del mundu castreñu ye bien complexu, una y bones se desenvuelve ocupando distintes etapes, dende les primeres construcciones, a últimos de la Edá del Bronce, hasta la romanización. N’Asturies documéntase un númberu importante de castros, los más d’ellos concentraos nes zones central y occidental de la rexón. 

Los poblaos fortificaos yá fueron oxetu d’interés arqueolóxicu dende últimos del sieglu XIX. D’esta manera, en 1876 el maestru José María Flórez y González fizo les primeres escavaciones nel castru de Cuaña. Depués, en 1917, Aurelio de Llano y Roza de Ampudia, miembru de la Comisión Provincial de Monumentos, escava n’El Picu’l Castru de Caravia, el pueblu d’él. Pero ye’l llabor descomanáu de prospección de José Manuel González y Fernández-Valles el que, a lo llargo de trenta años, dexó catalogar 265 recintos fortificaos n’Asturies, inventariu al que-y amestó notes y croquis detallaos d’orientación, estructura y llista d’elementos defensivos.

Les investigaciones arqueolóxiques más recientes, que se fixeron a partir del Plan Arqueolóxícu Director de la cuenca del Navia-Eo, paez que ponen de manifiestu que’l momentu fundacional de dellos d’estos poblaos data d’últimos de la Edá de Bronce, lo que dexa rellacionar l’orixe del mundu castreñu asturianu coles etapes fundacionales de poblaos castreños de Galicia y Portugal.

L’apaición de determinaos elementos cerámicos o metalúrxicos nel rexistru arqueolóxicu amuesa que ye a lo llargo la Edad de Fierro cuando esti sistema de poblamientu se xeneraliza y cuando los castros tienen una configuración asemeyada a la que conocemos anguaño: la fortificación xeneralizada de los recintos, con fosos o muralles de módulos, presentes tanto en castros del área central (La Campa Torres, en Xixón) como en castros de la zona occidental asturiana (El Chao Samartín, en Grandas de Salime); y la diversificación de construcciones dientro de los recintos, afayándose a la topografía del terrén.

Munchos d’estos castros, sobre manera aquellos que s’asitien na zona occidental de Asturias, van pervivir y esperimentar tresformaciones na so configuración depués de la conquista romana. La importancia estratéxica d’estos enclaves y la cercanía a los xacimientos auríferos esplotaos daquella, posibilitaron la so integración nos modelos nuevos d’organización territorial introducíos por Roma.

Cultura castreña. Muséu Arqueolóxicu d’Asturies.