Romanización
La edá antigua n’Asturies entama col procesu d’integración nel imperiu romanu, a partir de les guerres cántabres, ente’l 29 y el 19 a. C. Van ser oxetu d’una atención especial poles fontes clásiques y anque nada nun espliciten sobre’l so alcance nel territoriu tresmontanu, cúntase col testimoniu arqueolóxicu del movimientu de tropes nes llendes monteses de los pasos hacia’l norte al traviés del cordal: nel occidente los campamentos de campaña de Moyapán y El Castiel.lu de Val.láu (Cangas de Narcea), A Granda das Xarras y A Recacha (Ibias), El Chao de Carrubeiro (Bual), A Pedra Dereta (Bual-Castropol) y El Pico el Outeiro (Taramundi-Vilanova d’Ozcos); na zona central los recintos d’El Mouru, El Colláu Valbona, El Llaurienzu (Grau-Balmonte de Miranda), Las Cruces (Grau), Cueiru (Teberga) y El Xuegu la Bola (Teberga/Somieu) na vía de La Mesa; y de Curriel.los (L.lena), Carraceo (L.lena-Ayer) y L.lagüezos (L.lena-Villamanín), na vía de La Carisa.
La incorporación al Imperiu va suponer una tresformación sociopolítica notable, anque n’Asturies el fenómenu urbanizador ye ruin, y nun ye fácil identificar les poblaciones tresmontanes mentaes poles fontes clásiques (Lucus Asturum, Noega, Paleontium o Flavionavia), cuestionándose la rellación ente la Gigia citada por Ptolomeo y el Xixón romano. Sí rescampla la perviviencia de los recintos castreños, con una estructura urbana nueva, qu’implica remodelaciones nes defenses y na trama interna, más complexa, que va articulase de manera más funcional. Per otru llau, va ser notable la importancia del poblamientu rural dispersu n’establecimientos tipu villa.
Cuntamos con restos significativos asociaos al ámbitu romanu y tardoantiguu en forma de mosaicos (La Vega’l Ciigu, Veranes o La Estaca), termes (El Campu Valdés, Valdunu y Llugo) o enterramientos (Paredes y Argandenes). La implantación plena del territoriu asturianu nel mundu romanu va manifestase amás na epigrafía, la cerámica, los oxetos d’adornu y el numerariu, con abondos exemplos que faen parte de la esposición permanente del Muséu Arqueolóxicu d’Asturies.
Dalgunos de los nicios más llamaderos de la presencia romana nel territoriu son les güelges d’esplotaciones mineres del occidente asturianu: los cortes conocíos como fanas o freitas, con una presencia impactante en el paisaxe (La Fana la Freita o La Freitarbosa n’Ayande), y restos d’infraestructura minera, como canales (el de Salave, ente Castropol y Tapia; o Penafurada, en Grandas de Salime) y depósitos (El Palo, Ayande).
La minería del oro en Asturias. Muséu Arqueolóxicu d’Asturies.