A primeros del periodu xeológicu nel que tamos, l’Holocenu, les actividaes básiques de subsistencia de les sociedaes mesolítiques van siguir siendo la caza, la pesca y la recolección. Una d’eses cultures mesolítiques, l’Asturiense, foi definida pol Conde de la Vega del Sella a partir d’escavaciones arqueolóxiques en cueves como El Penicial, La Riera o Valmori, xacimientos al pie de la costa con abondos restos de moluscos. La ferramienta simplifícase enforma, destacando’l peculiar picu asturiense, fechu sobre regodones, d’aspectu toscu, pero con un diseñu que s’axusta a les xeres de marisquéu.

Estes comunidaes van dir pasín a pasu cambiando p’hacia moos de vida sedentarios. Nel Neolíticu va escomenzar un periodu caracterizáu pola práctica de l’agricultura y el pastoréu. Alredor del IV mileniu AC, hachos pulimentaos, abondos microlitos y restos cerámicos van señalar l’apaición de tecnoloxíes adaptaes a les necesidaes nueves de producción y consumu. Xurde nel paisaxe una relación estensa de construcciones funeraries megalítiques, n’agrupaciones como La Cobertoria, El Monte Areo, El Monte Deva o La Sierra Plana de la Borbolla. Conócense amás dólmenes singulares polos restos decorativos que tienen, como’l de la capiya de Santa Cruz.

El desenvolvimientu de la metalurxa va producise na primer metá del III mileniu AC, cuando entamen a explotase les mines prehistóriques del Milagru y del Aramo, onde se conservaron restos humanos y de la ferramienta minero. Estes sociedaes calcolítiques y del Bronce antiguu van desarrollar una metalurxa cenciella, fabricando oxetos d’adornu, ferramienta o armes. N’Asturies, la presencia de megalitos y l’afayu de puntes de tipu palmela en zones altes de monte, suxer el tránsitu d’estos grupos per pasos elevaos, gracies a un bon conocimientu del terrén. El mou de vida sigue siendo agrícola y pastoril, actividaes que van tresformar el paisaxe, y diversifícase’l ritual funerariu, col usu de dalgunes cavidaes como cueves sepulcrales (Trespandu, El Cuélebre, Los Canes…). A esti periodu correspuende’l nomáu ídolu de Peñatú. Tamién los averos de Fresnéu o la Cova del Demo conserven nicios significativos de pintures de la época.

El Bronce plenu supón el desarrollu d’una metalurxa más sofisticao y de más calidá, y el Bronce final, alredor del I mileniu AC, va señalar el momentu fundacional de los primeros poblaos fortificaos de la rexón.

El Asturiense y el conde de la Vega del Sella. Muséu Arqueolóxicu d’Asturies.

La minería del cobre en Asturias. Muséu Arqueolóxicu d’Asturies.