El Principáu d’Asturies tien un bon númberu de xacimientos arquelóxicos, repartíos per tola so xeografía. Cada etapa histórica, una tres de la otra, foi dexando la so marca nel territoriu, dende los tiempos paleolíticos más llonxanos, lo mesmo nes fases más antigües que nel xacimientu abiertu d’El Cabu Bustu o los restos neandertales de la cueva de Sidrón, o que nes cueves y averos del Paleolíticu superior, del que’l llegáu más señaláu son los exemplos d’arte parietal tan estraordinarios y abondantes qu’hai. De los milenios finales y posteriores al Paleolítico, de la que s’avanza hacia’l fin de les sociedaes que namás yeren cazadores-recolectores, Asturies tien xacimientos Azilienses, como la cueva de Los Azules, y Asturienses, mui bien representaos nes cascareres de la zona oriental de la rexón. 

La Prehistoria recién, marcada pola implantación de les sociedaes agrícoles y ganaderes y el desenvolvimientu de les edaes metalúrxiques del Cobre y del Bronce, ta representada pol mundu simbólicu de los munchos dólmenes, ente los que rescampla’l de Santa Cruz y los grabaos y pintures fechos sobre una peña tan escepcional como la de Peñatú. 
A lo llargo de la Edá del Fierro va configurándose la cultura castreña, que se caracteriza pola presencia de poblaos fortificaos; d’estos, Asturies tien catalogaos más de trescientos xacimientos. Con ellos, la Prehistoria rexonal empobínase p’hacia l’Antigüedá y la romanización del territoriu. 
L’arqueoloxía de la Edá Media faise presente na arquitectura escepcional de la monarquía asturiana, en torres, fortificaciones, ilesies, monesterios y exemplos significativos tanto d’estructures urbanes como de llugares rurales medievales.