Asturies cuenta con testimonios de toles fases del Paleolíticu. Los protagonistes son delles especies humanes. Caúna d’estes desplegó les sos estratexes propies d’adaptación al mediu, basaes toes elles nuna economía cazadora-recolectora. Preseos de piedra del Paleolíticu inferior atopáronse na rasa costera d’El Cabu Bustu, con una antigüedá de más de 300.000 años y, polo tanto, asociaos probablemente al Homo heildebergensis. Menos vieyos son los afayos neandertales del periodu Musteriense, asociaos al Paleolíticu mediu, de los que los esponentes más significativos son los restos de güesos de la cueva de Sidrón, con unos 50.000 años d’antigüedá, y los preseos líticos del averu de La Viña. 
La única especie humana presente güei nel planeta, l’Homo sapiens, documenta la so presencia n’Asturies dende feches antigües del Paleolíticu superior, hai unos 35.000 años. Esti periodu desenvuélvese tou él nel periodu glacial últimu, con unes condiciones climátiques de munchu fríu a les que s’afixieron los grupos humanos nuevos. Les diferentes cultures asociales a la humanidá moderna tán representaes n’abondos xacimientos arqueolóxicos d’Asturies, que guardaron a lo llargo de milenta años muestres d’una cultura material mui especializada y diversificada, igual qu’exemplos importantes de la so cultura simbólica, lo que se conoz como arte paleolíticu. Asturies tien anguaño cincuenta cueves y averos con pintures y grabaos rupestres que s’esparden peles exes fluviales del Nalón, el Sella, el Cares-Deva, amás de pela costa del oriente. Unos cuantos d’ellos atópense ente los conxuntos más significativos. d’arte parietal européu.
 
El final de los tiempos glaciales, hai unos 11.000 años, y el cambéu progresivu p’hacia les condiciones climátiques actuales documéntase n’Asturies nos niveles arqueolóxicos del Aziliense, periodu col qu’acaba’l gran arte paleolíticu y que ta bien representáu na cueva de Los Azules. Depués de la glaciación y a lo llargo de más de 5.000 años, fueron introduciéndose formes de vida nueves, afayaes a los paisaxes nuevos de biesques templaes a la retirada de la fauna fría y al averamientu de la llinia de costa. Los cazadores-recolectores azilienses siguieron calteniendo llazos cola tradición paleolítica, pero al periodu siguiente foi avanzándose yá p’hacia’l Neolíticu. Los cazadores-recolectores del periodu Asturiense siguieron cola actividad de la caza, tanto en territorios baxos como de monte y, al par d’ella, desenvolvieron una actividá marisquera intensa, que quedó fosilizada visiblemente nes cascareres de la costa oriental.