Dolmen de Santa Cruz
El dolmen de Santa Cruz asítiase en Cangues d’Onís, nel barriu de Contranquil, embaxo la ilesia de Santa Cruz, construyida enriba del túmulu que cubría’l monumentu funerariu. La capiya primera yera una edificación prerrománica erixida pol Rei Favila nel añu 737 d. C., que se sustituyó por otra edificación nel añu 1632. El conxuntu, declaráu Monumentu Nacional en 1931, quedó estrozáu cuando la Guerra Civil. La ilesia y el túmulu reconstruyéronse depués del conflictu bélicu por Luis Menéndez Pidal.
Descritu yá en 1857 pol historiador Manuel de Assas, el dolmen escaváronlu Juan de Dios de la Rada y Delgado y Juan de Malibran y Autet en 1871, constatando la existencia del cotapín artificial qu’anubría’l dolme, cola so estructura dañada por cuenta del espoliu que sufriere naquellos años. Vega del Sella vuelve a escavar el monumentu en 1891, pero ye Juan Cabré Aguiló quien identifica en 1915 los restos pictóricos y piquetiaos que decoraben los ortostatos. Vega del Sella publica la monografía del monumentu en 1919, na colección de memories de la Comisión d’Investigaciones Paleontolóxiques y Prehistóriques.
Dientro de la cámara podemos atopar cinco llastres grandes y otres dos llábanes más pequeñes. La llastra más grande forma la cabecera del sepulcru, que supera los dos metros d’altu. Tola cámara ta adornada con grabaos y dibuxos qu’anguaño tán nun estáu precariu de caltenimientu. Los motivos decorativos son xeométricos, con formes triangulares, llinies quebraes y diseños lliniales. La cronoloxía del xacimientu establecióse alredor del III mileniu a. C.
Toos esos arreglos, formes o elementos decorativos son consecuencia d’una intención precisa, afayada a les claves y mensaxes del ritual neolíticu. El monumentu funerariu de Santa Cruz presenta una gran singularidá, comparable a otros megalitos pintaos de Galicia o norte de Portugal; pintar los dólmenes ye cosa namás del occidente ibéricu, onde s’afayen los paralelos más precisos pa esti testimoniu cantábricu escepcional.
Sacáu del axuar espoliáu del dolmen, consérvase un hachu pulimentáu escepcional, anguaño espuestu nel Muséu Arqueolóxicu d’Asturies.
Visites:
- Abierto al públicu tol añu. Zarrao llunes y martes.
- Visites guiaes en Selmana Santa y branu. Dellos pases al día con cupu llimitáu.
- Información y reserves: Oficina de Turismu de Cangues d’Onís.
- Teléfonu: 985848005
- Corréu electrónicu: cangasdeonis@cangasdeonis.com
- Más información: www.cangasdeonis.es