Peñatú
Asitiáu cerca de Puertas (Llanes), ye un bloque de piedra arenisco que corona’l oeste de la Sierra Plana de la Borbolla. Descubriéronlu en 1913 Eduardo Hernández-Pacheco y Estevan y el Conde de la Vega del Sella. La monografía, con dibuxos de Juan Cabré Aguiló, espublizóse en 1914 y ye’l primeru de los estudios de la colección de memories de la Comisión d’Investigaciones Paleontolóxiques y Prehistóriques en ver la lluz. Declaróse Monumentu Nacional en 1924.
Nel bloque distínguense dos tipos de representaciones, ensin poder determinase si se trata de fases gráfiques sincróniques o diacróniques: per un llau, series de puntuaciones y representaciones humanes mui esquemátiques, too ello pintao en coloráu, qu’ocupen la parte central del peñascu. Per otru llau apaecen representaciones onde s’asocien pintura y grabáu, destacando’l llamáu “Ídolu”, representación antropomorfa formada por un campu rectangular rematáu nun semicírculu y con dos círculinos paralelos nel interior interpretaos como güeyos. A la esquierda represéntase un puñal, que tien paralelismos claros con oxetos del Bronce antiguu, y que val pa facer un averamientu a la cronoloxía del conxuntu.
Un tercer grupu de representaciones son cruces grabaes y piquetiaes, mui posteriores nel tiempu, quiciás feches ente la baxa Edá Media y la Edá Moderna.
La interpretación del ídolu que faen dalgunos investigadores suxer la representación d’un personaxe amortayáu, que presenta semeyances mui evidentes con representaciones atopaes en Cantabria, Llión y Portugal. Esta interpretación diba dexar rellacionar el monumentu col conxuntu d’enterramientos tumulares llantaos na sierra plana de La Borbolla.
La cronoloxía de les representaciones más antigües del conxuntu establecióse nel Calcolíticu o Bronce antiguu, alredor del III mileniu a. C.
La esposición natural del peñascu y la falta de protección hasta los años trenta del sieglu XX provocaron un procesu evidente d’estroza nes representaciones gráfiques conservaes, sobre manera nos restos de pintures coloraes, que nun resulten fáciles d’estremar.
Visites:
- Abiertu tol añu. Llunes y martes zarrao.
- Teléfonu d’Información: 664382026.
- Nun se dexa l'accesu con animales al recintu del xacimientu.
- Cómo llegar: dende la carretera nacional 634 a l’altura de Puertas. Dexar el vehículu aparcáu al pie del Centru d’Interpretación y garrar el camín peatonal señalizáu, a lo llargo de 900 metros.