Asitiáu en Villacondide, ocupa’l cumal d’un cuetu de malpenes 100 m d’altu penriba de la ribera derecha del regatu de Sarreo. Castru de dimensiones notables, con una superficie d’alredor de 7 ha, ye ún de los exemplos más representativos de la cultura castreña n’Asturies, sobre manera pol númberu tan grande y la entidá de les construcciones escavaes, resultáu d’una actividá arqueolóxica y restauradora intensa. Estos trabayos entamaron de manera temprana a últimos del sieglu XIX, anque ye ente 1939 y 1944 cuando Juan Uría Ríu y Antonio García Bellido escaven cuasi tolo que ye visible anguaño.

Les más de les estructures descubiertes estrémense en dos sectores: el d’arriba, tamién llamáu acrópolis, ye un espaciu ampliu cercáu por una muralla ancha, qu’en dalgunos tramos tien delantre dos fosos y  bastiones de refuerzu, y que presenta escalinates al interior; y el d’abaxo, llamáu barriu norte, compuestu por una casería apetiguñada arrodiada por una muralla y que concentra cerca d’ ochenta edificaciones, onde predominen les plantes circulares anque nun falten otres ovales o rectangulares. Axúntense en garrapiellos uníos por plazoletes o caleyes no que paez un llaberintu constructivu, onde un percorríu posáu va dexanos ver  la existencia de canalizaciones, pavimentos en chapacuña, bancos corríos, restos de llariegues y piedres con cazoletes. Nel sector suroriental del recintu fonderu llama l’atención la puerta d’entrada al castru, con dos cuerpos de guardia a cada llau; un gran torrexón de planta cuadrangular; y un conxuntu compuestu por dos instalaciones termales, asemeyaes a les qu’apaecen n’otres partes del noroeste de la península ibérica, y sobre manera nos castros asturianos de Pendia, Os Castros de Taramundi y El Chao Samartín.

Les investigaciones que se llevaron a cabu nel castru dexen establecer la fundación d’El Castriyón na Edá del Fierro, alredor del sieglu IV a. C., con una pervivencia intensa en época romana, dende’l sieglu I hasta finales del sieglu II d. C., que significó reformes importantes na estructura del recintu. La ocupación y usu del llugar cuando la romanización esplícase pola so ubicación estratéxica, averada a les esplotaciones auríferes de la zona, cumpliendo funciones de calter alministrativu dientro de la reorganización territorial establecida en dómina romana.

Áula Didáctica:

La visita al castru compleméntase cola información qu’ofrez l’Aula Didáctica con un percorríu pel fenómenu castreñu del Noroeste peninsular. Partiendo d’una descripción curtia de los métodos d’investigación arqueolóxica, dellos espacios espositivos van amosando socesivamente la evolución del fenómenu cultural rellacionáu colos poblaos fortificaos dende los oríxenes hasta la romanización, poniendo un empeñu especial nel casu d’Asturies, la minería del oru y el propiu Castriyón de Cuaña.

Horarios y visita:

• Abierto tol añu.
• Llunes y martes zarrao.
• Atención al públicu: de miércoles a domingu: del 1 d’ochobre al 30 de marzu, de 10:30 a 15:30 h; del 1 d’abril al 30 de setiembre, de 10:30 a 17:30 h.
• Teléfonu: 985978401
• Nun se dexa l'accesu con animales al xacimientu.

Tarifes:

• Xeneral: 3,13 €
• Reducida: 1,62 € (neños de 7 a 12 años, mayores de 65 años, Familia Numberosa, y carné mozu).
• Al tratase d'una tasa pública del Principáu d'Asturies, les entraes tienen d'abonase n'efectivu na taquilla del castru.

Accesu:

• dende Navia, carretera AS-12, kilómetru 6.