Asítiase nel cabu Torres, al oeste de Xixón, con una altura máxima de 120 m, nun entornu de cantiles sobre fondiaderos naturales, anguaño ocupaos pola térmica d’Aboño y el puertu d’El Musel. Una escavación pionera fecha nel terciu últimu del sieglu XVIII pol arquitectu Manuel Reguera González por mandáu de Gaspar Melchor de Xovellanos, quería localizar el puntu de procedencia d’una llábana conocida dende’l sieglu XVI n’honor del emperador Augusto, y que dalgunos rellacionaron col monumentu de les ares sestianes mentáu poles fontes clásiques. Estes escavaciones tempranes sacaron la planta de dos edificaciones, anguaño desapaecíes. En 1972 José Manuel González cataloga La Campa Torres como un recintu castreñu, que s’escavó de manera sistemática dende 1982 hasta 1996. 

El castru tien una superficie aproximada de 8 ha y queda al final de la península allargada que conforma’l cabu, defendíu al sur por un fosu, un contrafosu y una muralla de módulos. Les escavaciones arqueolóxiques realizaes tres de la muralla y na esplanada interior sacaron delles estructures d’habitación de planta circular y rectangular, amás de dellos pozos d’agua, confirmando un hábitat prerromanu  d’alredor del sieglu IV a. C. Los restos arqueolóxicos de dómina prerromana documentaos evidencien una actividá metalúrxica intensa en castru, y tamién oxetos d’orixe meridional escasos pero valiosos, reflexu d’intercambios comerciales a llarga distancia al traviés d’intermediaciones socesives.

La ocupación romana de La Campa Torres produzse yá dende primeros del sieglu I d. C., y hasta últimos del sieglu III d. C., y supón una tresformación urbanística del recintu, qu’introduz na esplanada del cabu viviendes cuadrangulares de dellos cuartos con estragales d’accesu, cubiertes romanes de tégula y ímbrices y pavimentos más cuidaos. 

Anguaño La Campa Torres ye un Parque Arqueolóxicu onde amás del propiu xacimientu afáyase un muséu, aprovechando un emplazamientu vieyu d’artillería de costa, y amás pue visitase’l faru, convertíu en sala d’esposiciones y biblioteca.

 

Visites: