Pobláu fortificáu asitiáu al pie del llugar de Castro, en Grandas de Salime. Allúgase nun resalte del terrén con cuestes bien pindies a oeste, norte y sur, conque l’accesu natural ye pel llau oriental. La existencia del recintu fortificáu yá se menta nel sieglu XIX nos papeles del corresponsal pal diccionariu xeográfico-históricu inéditu de Francisco Javier Martínez Marina; y tamién en 1900 na obra Asturias d’Octavio Bellmunt y Fermín Canella, en cita recoyida por José María Méndez-Valledor. Catalogáu en 1967 por José Manuel González, viose afectáu por escavaciones irregulares; y en 1990 entama la investigación sistemática, hasta’l 2008, dientro del Plan Arqueolóxicu Director del Navia-Eo.

Anguaño hai escavada una superficie de 5500 m² onde s’estremen trés sectores: el sector oeste, coincidente col recintu cimeru, asociáu a la ocupación más antigua del castru; el sector norte, onde se localizó una casa romana grande de dómina altoimperial; y el sector sur, onde s’atopen les más de les edificaciones del recintu. Predominen edificaciones de planta circular, oblonga y cuadrangular, nes que destaca la presencia d’una plaza pavimentada y una estructura termal.

La fundación del pobláu remóntase a últimos de la Edá del Bronce, alredor del 800 a. C., fecha determinada a partir de restos arqueolóxicos afayaos nel recintu cimeru y delles dataciones radiocarbóniques. La primer trama de construcciones doméstiques y les fortificaciones de fosos y muralla de módulos desenvuélvese na Edá del Fierro, alredeor del sieglu IV a. C. Yá dende primeros del sieglu I d. C. detéctase la presencia romana en castru, de la que la manifestación más evidente ye la renovación de les estructures defensives en dos fases diferentes, con un sistema nuevu de fosos. Les reformes del aparatu defensivu vincúlense a la presencia de continxentes militares, y les característiques de la domus localizada nel sector norte -dimensiones, estructura en dos altures y suntuosidá decorativa y del axuar recuperáu- apunten a la presencia n’El Chao Samartín d’un personaxe romanu d’altu rangu, rellacionáu cola alministración impuesta pal control de les esplotaciones auríferes del occidente d’Asturies.

La riqueza arqueolóxica del xacimientu exhíbese nel Muséu anexu, con más de 350 pieces espuestes que dexen facer un percorríu per toles etapes d’ocupación del castru, dende la Edá del Bronce hasta últimos del sieglu II d. C.

Visitas:

• Abierto de martes a domingu. Zarrao los llunes.
• Horarios d’atención al públicu: d’ochobre a mayu, de martes a sábados, de 11:00 a 13:00 y de 16:00 a 17:30; domingos y festivos de 11:30 a 13:30. Del 1 de xunetu al 30 de setiembre, de martes a sábados de 11:00 a 13:00 y de 16:00 a 19:00. Domingos y festivos de 11:30 a 13:30. 
• Visites guiaes al castru. Duración aproximada 45-60 minutos. 
• Más información: www.castrochaosamartin.esy.es