Les llamaes Covas d'Andía allúguense cerca del pueblu del mesmu nome, nel conceyu d'El Franco. Ye un llugar de gran interés xeolóxicu, nuna depresión kárstica que da llugar a un valle semizarráu, percorríu por un regueru que termina por vertir agües a El Río del Mazo. El so valor xeomorfolóxicu céntrase na naturaleza de la peña: mármole del Cámbricu inferior correspondiente a la Formación A Veiga, abondo raro nel occidente asturianu. La importancia arqueolóxica del sitiu ye grande, al ser bona parte del paraxe que vemos anguaño’l resultáu de los llabores mineros que se realizaron na época romana pa la estracción d'oru.

Una de les descripciones más antigües d'esti xacimientu ufiértala Pascual Madoz en 1861, cuando describe “un valle que nun sería obra de la naturaleza sinón formáu pola mano del home pa consiguir la esplotación del mineral”. Ye la zona central d'un complexu mineru notable con una gran cantidá de restos d'esplotaciones a lo llargo del cursu d’El Río del Mazo, y onde tamién destaca la presencia de dos recintos fortificaos: A Corona y El Castrón.

N’Andía catalogáronse dos zones d'esplotación minera sobre xacimientos primarios, onde l'oru s’atopa en filones o de forma masiva na peña, esplotaos con cortes a cielu abiertu, que n’As Covas d’Andía preséntense con munchos metros de desnivel. Tamién se caltienen restos de depósitos y canales de captación d'agua, fuerza esencial d’estracción, arrastre y llavadura del mineral. De resultes de la esplotación minera también s’aprecien galeríes, pozos ciegos, trincheres y acumulaciones d’estériles cubiertos pola vexetación abondoso. 

La combinación del tipu de peña y de l'actividá humana dio llugar a un paraxe bien singular, con importantes valores medioambientales, polo que'l Gobiernu del Principáu d'Asturies declaró As Covas d'Andía como Monumentu Natural nel añu 2002, dientro del Plan d'Ordenación de los Recursos Naturales d'Asturies.

Visites:

• Imprescindible reserva previa. Accesu namás en visita guiada.
• Xunetu, agostu y setiembre, de martes a domingu a les 12:00 y a les 16:30.
• Restu del añu, sábados, domingos y festivos, a les 12:00 y a les 16:00.
• Información y reserves: 619368169
• Más información: Conceyu d'El Franco

Cómo llegar:

• Dende A Caridá, tomar la carretera FR-1 en dirección a Arancedo (6 km). Dende Arancedo, tomar la esviación señalizada a la izquierda hacia As Covas d'Andía (2 km).