Asitaes nel barriu de Cimavilla de Xixón, las ruines yá se conocíen dende primeros del sieglu XX, gracies a la escavación que fixeron en 1903 Calixto Alvargonzález y Julio Somoza cuando les obres d’alcantarelláu delantre de la ilesia de San Pedro. La destrucción de la ilesia cuando la Guerra Civil fixo surdir los restos romanos, que volvieron a quedar cubiertos cola reconstrucción del templu. Dende 1990 les termes volvieron a escavase, colo que se recuperó’l xacimientu pa la visita pública, integráu nun muséu de sitiu.

N’orixe trataríase d’una construcción d’exa llinial, con un pasillu a lo llargo del que s’abren les estancies. L’esquema termal inclúi’l vestuariu (apodyterium), sala de bañu fría (frigidarium), sala de bañu templada (tepidarium), sala de bañu caliente (caldarium) y sauna (sudatio). Ún de los elementos característicos de les estructures termales ye la presencia del sistema de calefacción, al traviés de la circulación d’aire caliente per baxo del suelu y detrás de les parés de les estancies dende una llariega o praefurnium. L’aire circula pel hipocaustu, estructura güeca fecha a partir de columnines formaes por lladriyos superpuestos. Les canalizaciones d’agua a los baños facíense con teyes de tamañu grande. El plan de circulación yera retrógradu, quier dicise, entrábase y salíase pelos mesmos cuartos. L’itinerariu principal empecipiaba en vestuariu y siguía na sala de baños fríos, dende onde s’accedía a los ambientes calorosos. El conxuntu termal orixinal data de primeros del sieglu II d. C. y siguió n’usu hasta últimos del sieglu IV d. C., con una reforma del conxuntu a últimos del sieglu II d. C.

Destaca la decoración pictórica que se conserva en delles de les estancies, realizada con técnica al frescu, que se caracteriza por siguir un esquema decorativu cenciellu, con motivos xeométricos y vexetales.

Las termes son un indicador clave de romanización, por mor de que suponen l’adopción d’un vezu enraigonáu fuertemente na sociedá romana.

Visites:

• Abierto de martes a domingu. Zarrao los llunes.
• Atención al públicu: martes a vienres de 9:30 a 14:00 y de 17:00 a 19:30; sábados, domingos y festivos de 10:00 a 14:00 y de 17:00 a 19:30.
• Más información: Museu Termes Romanes d'El Campu Valdés