Villa de Veranes
Trátase d’un asentamientu rural de 1 ha aproximao, asitiáu sobre una fastera que-y da una posición topográfica privilexada, nel llugar conocíu como La Venta Veranes. La conservación de dellos muros y la visibilidá que tien provocó abondes intervenciones furtives y descontrolaes, anque tamién la fixo oxetu d’interés por parte d’estudiosos y eruditos locales dende primeros del sieglu XX. Les primeres escavaciones fíxoles el párrocu Manuel Valdés Gutiérrez, alredor de 1919; más tarde, volvió a escavase por Joaquín Manzanares nos años sesenta. Dende 1983 retómense les escavaciones dientro del Proyectu Xixón d’Escavaciones Arqueolóxiques, que permitió l’apertura al públicu del xacimientu, integráu nun muséu de sitiu.
Les investigaciones llevaes a cabu na villa proponen una ocupación mui llarga nel tiempu, que garraría dende la segunda metá del sieglu I d. C. hasta’l sieglu VI d. C. Lo que se conserva ye’l resultáu de reformes y ampliaciones socesives que se fixeron en dómina tardorromana, que dan na conformación d’un espaciu organizáu en cuatro terraces escavaes na fastera, que definen un conxuntu de tipu llinial.
Anque nun foi posible determinar l’articulación funcional de tolos espacios escavaos, nel sector oriental llama l’atención una estancia grande absidiada, interpretada como un triclinium, que conserva nicios del mosaicu que la pavimentaba; al sur d’esta estancia reconozse una zona termal, con restos del hipocaustu. Hacia’l norte un corredor grande en dirección norte-sur comunica les estancies de les terraces d’abaxo con una estancia grande cuadrangular, pavimentada con un mosaicu xeométricu. Na zona occidental apaecieron cuartos de dimensiones más pequeñes, articulaos alredor d’un pasillu con orientación este-oeste. Al noroeste identifíquense dos edificios exentos, un posible horreum y una estructura compuesta por cinco estancies onde se conserven restos d’un fornu domésticu.
La villa caltúvose n’usu hasta’l sieglu VI d. C.; a partir d’esti momentu, la estancia meridional grande conviértese en sitiu de cultu baxo l’advocación de Santa María y San Pedro, al tiempu que bona parte de la edificación romana s’amortiza, faciendo que sobre les murueques s’estienda un cementeriu altomedieval asociáu a la ilesia.
Visites:
- Abierto de martes a domingu. Zarrao los llunes.
- Atención al públicu: del 16 de setiembre al 15 de xunu, de 10:00 a 15:00; del 16 de xunu al 15 de setiembre, de 10:00 a 17:00.
- Más información: Museu Villa Romana de Veranes
Enllaces: