Descubrióse en 1908 y ye parte de los cuatro primeros descubrimientos del arte rupestre paleolíticu asturianu, amás de les cueves d’El Pindal, Mazaculos y El Quintanal.

Ye una cueva pequeña que s’abre nun cuetu calizu de la ribera derecha del ríu Cares-Deva, dominando una vega amplia. La boca ábrese a un estragal pequeñu. Na paré derecha caltiénense nicios d’una señal pintada en coloráu.

Depués del estragal, sigue una galería estrecha y alta na que s’atopa, a unos veinticinco metros de la entrada, un conxuntu solu de grabaos paleolíticos, fechos sobre un tramu de paré tiñíu por una pátina de color negro, de manganesu. La composición representa un grupu de seis uros mirando pal fondu de la cueva, dispuestos nuna manada pequeña. Les figures ordénense d’alcuerdu cola perspectiva visual, aludiendo al espaciu tridimensional con recursos gráficos mui arteros que quieren representar los distintos planos de fondura y la distancia. Ye’l casu de la superposición parcial ente dalgunes de les figures, la representación parcial de l’anatomía d’ún de los uros (la cabeza namás) y del tratamientu desigual que se-y da al tamañu de los animales. Pela cueta, la representación de la cuerna nun respuende a la corrección del puntu de vista tridimensional sinón al xuegu de distintos ángulos de visión, lo que Breuil definió como perspectiva torcida y semi-torcida. La orientación y traza distinta que-yos apliquen tien dao pie dacuando a errores d’interpretación sobre la especie representada.

El recursu técnicu aplicáu a esti panel ye singular. El color del soporte dexa ver el grabáu por cuenta del contraste que xenera la llinia incisa sobre’l fondu escuru. Amás, l’altura a la que s’afaya, a cuatro metros del suelu actual de la galería, facilita una bona observación de la escena.

La cueva escavóla Vega del Sella en 1929. Nos sos trabayos documentó un nivel arqueolóxicu solu, correspondiente al final del periodu magdaleniense, lo que casa coles característiques formales de les figures grabaes.

A pesar de contar con un númberu de representaciones pequeñu, la cueva de La Loja dexa estremar con claridá una técnica, el grabáu, que ta normalmente acotada nes cueves grandes con pintures, onde nun ye posible averase a les parés por motivos de conservación.

Visites:

• Abierta en Selmana Santa y branu.
• Visites de martes a domingu. Llunes zarrao.
• Imprescindible reserva previa.
• Accesu infantil a partir de 7 años.
• Nun se dexa l'accesu a la cueva con animales.
• Más información: www.aytopbpanes.es