La Cueva del Conde o del Fornu y l’averu de Santu Adrianu o d’El Foxacu atópense a pocos metros de les veres d’El Ríu Trubia, tributariu del Nalón, averaos a la carretera AS-228 y al llugar de Tuñón, nel conceyu de Santu Adrianu.

El Conde forma parte de los xacimientos clásicos del Paleolíticu asturianu. Ye en realidá un averu calizu con dos entrantes non mui fondos que se van estrechando. El xacimientu arqueolóxicu presenta problemes estratigráficos curiosos pola mor de les alteraciones provocaes pol so usu agropecuariu a lo llargo de décades. Escaváu de primeres por Vega del Sella en 1915, con posterioridá l’arqueólogu L. G. Freeman realiza un sondéu de carácter mui limitáu en 1962. Nun va muncho lleváronse a cabu estudios arqueolóxicos nuevos al cargu d’un equipu multidisciplinar, d’onde se sacaron delles dataciones radiocarbóniques. Nel xacimientu detéctense niveles d’ocupación de cronoloxía musteriense y auriñaciense.

Les representaciones gráfiques del Conde redúcense a trazos lliniales de grabáu fondu, conformando fexes de llinies paraleles en disposición vertical o horizontal, que yá vieron y reseñaron tanto Vega del Sella como Freeman, anque va ser Francisco Jordá’l primeru en facer una valoración arqueolóxica de los mesmos, suxiriendo una cronoloxía d’edá auriñaciense. Javier Fortea propón la so rellación col llamáu primer horizonte gráficu del Nalón, con un paralelu averáu nos grabaos lliniales de trazu fondu del averu de La Viña.

L’averu de Santu Adrianu, que ta cerca, atopóse en 1994 pol grupu d’espeleoloxía Polifemo y contién un conxuntu destacáu de figures grabaes repartíes nes sos dos parés llaterales, espuestes a la lluz y dispuestes en función de los accidentes naturales de la paré y de la topografía del averu. La figura más representada ye la venada, d’alcuerdu al estereotipu característicu del llamáu segundu horizonte gráficu del Nalón, que presenta una gran economía de llinies y una espresividá destacada, patente n’otros xacimientos del mesmu valle fluvial, como La Lluera I, El Molín d’Entrefoces, Las Mestas II o La Viña. Tamién apaecen la cabra y dellos bovinos, destacando dos representaciones escepcionales de bisonte.

Visites:

  • Imprescindible reserva o inscripción previa.
  • Visites guiaes en pases con grupos pequeños de visitantes.
  • Tfnu. de contactu: 985761403
  • Corréu de contactu: @info@laponte.org
  • Tarifa gratuita. Actividá subvencionada pola Conseyería de Cultura, Política Llingüistica y Turismu.
  • Más información: La Ponte. Centru d’Investigación y Ecomuséu