Descubierta en 1968 por un grupu d’espeleólogos mozos, asítiase na moría d’Ardines (Ribeseya), na desembocadura del ríu Sella. Ye una galería única de 700 m de llargor. Nel so percorríu estrémense delles sales secundaries, munches d’elles decoraes. La entrada prehistórica, anguaño ciega por un argayu qu’hubo depués de la ocupación paleolítica, asitiábase na parte suroccidental de la moría, sobre’l cursu del ríu San Miguel, responsable de la formación de la estensa rede de galeríes. La entrada d’agora, allugada nel estremu contrariu al de la entrada prehistórica, faise al traviés d’un túnel artificial abiertu en 1970 pa facilitar l’accesu a les visites turístiques.

Les investigaciones arqueolóxiques realizaes na cueva apunten a una ocupación intensa a finales del Paleolíticu superior, nel periodu magdaleniense, y permitieron la documentación d’una colección importante de pieces d’arte mobiliar, que s’amuesa nel Muséu Arqueolóxicu d’Asturies

A lo llargo de tola cueva consérvense evidencies d’arte premagdaleniense, en conxuntos como’l Camarín de les Vulves, el Panel de la Mano o la Galería de los Antropomorfos, y ta esplorada y decorada hasta nes zones más fondes dende los momentos iniciales del Paleolíticu superior.

De les zones decoraes namás pue visitase’l Panel Principal, conxuntu que presenta una secuencia diacrónica de grabaos y pintures complexa, onde s’identifiquen dos fases: una antigua, premagdaleniense, caracterizada por signos en coloráu y negru de tipoloxía variada y una figuración animal escasa; y otra más moderna, magdaleniense, qu’inclúi pintures d’animales (bóvidos, caballos, renos) y grabaos de signos y animales (venaos y cabres) nos que se reconocen técniques de trazu simple, trazu múltiple, estriáu y raspiáu. Lo más representativo del conxuntu son figures grandes de caballos y renos pintaos, nos que s’utilicen tonos distintos de color encarnao, negro y violeta, combinaos con grabaos y raspiaos del contornu. Trátase d’ún de los conxuntos cantábricos con una complexidá y variedá de recursos técnicos mayor y ye ún de los pocos paneles polícromos visitables del arte rupestre européu.

El Pozu’l Ramu incluyóse na llista de Patrimoniu Mundial de la UNESCO nel añu 2008, faciendo parte de la declaración Cueva de Altamira y Arte Rupestre Paleolíticu de la Rexón Cantábrica.

 

Visites:

  • Abierta del 1 de marzu al 31 d’ochobre. La cueva queda zarrada cuatro meses al añu por conservación.
  • Zarrao llunes y martes.
  • Atención al públicu de miércoles a domingu, dellos pases diarios con aforu llimitáu.

 

Observaciones:

  • Imprescindible compra antemanada de la entrada d’antemano.
  • Accesu infantil a partir de 7 años.
  • Desaconséyase la visita a persones con dificultades pa ver o movese. 
  • Encamiéntase usar ropa abrigao y calzáu afayadizo.
  • Nun se dexa l'accesu a la cueva con animales.

 

Más información: