La cueva d’El Pindal asítiase nel cabu de Santu Medé, un enclave natural y paisaxísticu privilexáu de la parte oriental d’Asturies, na localidá de Pimiango.

La única entrada que tien mira pa la mar y lleva, después d’un estragal grande con lluz natural, a una galería llinial na escuridá dafechu. La primer metá ye amplia y percuérrese fácil, y a lo llargo d’ella repártense cinco conxuntos con pintures y grabaos rupestres. Estes cinco zones atópense bien estremaes nel espaciu en sectores distintos de la paré o del techu. Dos d’elles queden pal llau esquierdu y trés nel derechu y toes, menos una, queden pal fondu d’esti gran corredor, a más de doscientos metros de la entrada.

El panel principal tien el garrapiellu mayor de pintures y grabaos, formando una composición homoxénea y ordenada. Ta formáu por abondes figures animales, que constituyen cuasi’l 80 % del total de zoomorfos presentes na cueva, y tamién signos abstractos, organizaos de forma individual o en conxuntu, de formes simples (trazos lliniales y puntos) y complexes (llaciformes, escutiformes y claviformes). Los demás paneles tán formaos por munches menos figures animales (ente una y trés), asociaes o non a series de puntos o de trazos lliniales.

La especie más representada n’El Pindal ye’l bisonte, siguíu del caballu, anque la más escenificada ye la venada y los más escepcionales el mamut y el pexe.

Técnicamente predominen el pigmentu colorao y el grabáu, anque existen tamién delles representaciones en color negro. Les figures o marques de color bermeyo apaecen nes cinco zones, mentes que lo negro ta concentrao sobre manera nuna d’ellas; el grabáu úsase en trés.

La visita turística dexa conocer cuasi toles figures coloraes y delles marques negres, pero non los grabaos, que son invisibles pa quien mira dende lloñe de la paré.

L’arte rupestre d’El Pindal remóntase probablemente a distintes fases del Paleolíticu superior. Son magdalenienses dafechu les señales claviformes, dellos bisontes coloraos, tolos grabaos y les pintures negres. Sicasí, los mamuts y la venada presenten convencionalismos más vieyos, igual que munches marques y signos coloraos.

Cien años depués de descubriles en 1908, les pintures y grabaos d’esta cueva incluyéronse na llista del Patrimoniu Mundial de la UNESCO como parte de la declaración Cueva d’Altamira y Arte Rupestre Paleolíticu de la Rexón Cantábrica.

Horarios:

• Abierta tol añu.
• Zarrao llunes y martes.
• Atención telefónica: de miércoles a domingu, de 15:00 a 17:00 h. 
• Ye imprescindible reserva telefónica previa. 
• Teléfonu: 608 175 284

Tarifas:

• Xeneral: 3,13 €
• Reducida:  1,62 € (neños y neñes de 7 a 12 años, mayores de 65 años, Familia Numberosa y Carné Mozu).
• Al tratase d'una tasa pública del Principáu d'Asturies, les entraes tienen d'abonase n'efectivu na taquilla de la cueva.

Observaciones:

• Accesu infantil a partir de 7 años.
• Desaconséyase la visita a persones con dificultaes de visión o movilidá.
• Encamiéntase usar ropa abrigao y calzáu afayadizo. 
• Nun se dexa l'accesu a la cueva con animales.

Accesu:

• Autovía A-8, Salida 277: dirección El Peral (N-634). Na travesía d’El Peral, garrar la carretera local RD-1, hacia Pimiango. En Pimiango, siguir pela carretera de la cueva.