Cueva de La Peña (Candamu)
Les pintures y grabaos de la cueva de Candamu descubriéronse científicamente en 1914 por Hernández-Pacheco y Vega del Sella.
Ye una cavidá que s’abre nun cuetu calizu conocíu pol nome de La Peña, dominando’l ríu Nalón sobre la localidá de San Román (Candamu). La entrada pequeña pela que s’accedía hasta 1914 agrandóse y afayóse pa facilitar l’accesu a les visites. Esta da pasu a una galería de percorríu curtiu, y a la derecha d’ella ábrese la Sala de los Signos Coloraos. Al fondu de la galería, al traviés d’un pasu estrechu, accédese al Salón de los Grabaos. Na paré contraria a esti accesu ábrese la Galería de les Batiscies, na que se conserven dalgunos grabaos finos, ente otros, un renu.
Les más de les obres paleolítiques de Candamu distribúyense alredor del Salón de los Grabaos, organizaos en distintos conxuntos, con nomes que se correspuenden cola forma del soporte estalagmíticu o del espaciu que les acueye.
D’esta manera, el Mogote Estalagmíticu conserva dalgunos grabaos enguedeyaos; nel Ribayu, destaca’l perfil d’un caballu coloráu; nel Panel de la Cabra, una única figura negra d’esa especie; y les Columnes tán decoraes con círculos coloraos impactantes, alliniaos en vertical na parte d’abaxo del fuste.
El Camarín ye un güecu que s’abre n’altura, amosando hacia’l Salón, con una intención marcadamente escenográfica, la figura d’un caballu robustu de color siena. El protagonismu d’esti disimula la presencia de les otres tres figures conservaes nesi mesmu espaciu (dos caballos más y un güe).
El Muru equival al panel principal, un palimpsestu de superposiciones apetiguñaes que resume cuasimente tola historia gráfica de la cueva. Ye una paré grande uniforme, percorrida a la metá por un cordón estalgmíticu qu’organiza bilateralmente los munchos temes figurativos pintaos y grabaos: bovinos, caballos, cérvidos, cabres, un osu, una figura rara interpretada como foca y un antropomorfu. No cimero del muru, a la esquierda, hai otru grupu figurativu importante formáu por bovinos, cérvidos, rebecos y un antropomorfu. Les superposiciones gráfiques que se producen ente ellos son significatives de les diferentes fases artístiques.
L’arte paleolíticu de Candamu ye representativu d’una secuencia cronolóxica amplia qu’escomienza en momentos antiguos premagdalenienses y complétase nel magdaleniense final. Esti sitiu ta incluyíu na llista de Patrimoniu Mundial de la UNESCO dende’l añu 2008, faciendo parte de la declaración Cueva d’Altamira y Arte Rupestre Paleolíticu de la Rexón Cantábrica.
La cueva cunta dende 1999 con un espaciu espositivu nel Palaciu Valdés Bazán, en San Román, que guarda répliques de los principales conxuntos de la cueva.
Visites:
- Abierta al públicu en Selmana Santa y branu.
- Visites de martes a domingu. Llunes zarrao.
- Fai falta reserva previa.
- Accesu infantil a partir de 7 años.
- Nun se dexa l'accesu a la cueva con animales.
- Más información: www.candamo.es