Cueva d'El Buxu
Descubrióla en 1916 Cesáreo Cardín, prospector del Conde de la Vega del Sella.
El so percorríu principal trescurre a lo llargo d’una galería pequeña, onde s’escavó’l suelu orixinal a mediaos del sieglu XX pa facilitar les visites a pie. Igualmente, la entradina pela qu’accedió Cardín en 1916 agrandóse y iguóse. A cada llau de la galería principal ábrense güecos que lleven a pozos y galeríes altes, de les que namás una, la Sala Grande, tien manifestaciones rupestres.
Les más de les obres paleolítiques queden nel trayectu principal, de la metá p’alantre del percorríu, y tán pintaes sobre too en negru o grabaes. El color bermeyo atópase en puntinos y trazos repartíos a lo llargo de la galería y espacios decoraos, nun signu con forma d’ E del tramu final de la cueva y na Sala Grande, sitiu onde s’atopen manches espardíes, un signu difumináu y una posible figura d’uru.
Les primeres figures negres, venaes y venaos, apaecen xusto nel puntu onde la galería s’estrema hacia la Sala Grande. Anque anguaño ta desapaecida, hubo tamién nesta encruciyada una figura grabada de caballu. Pero les más de les representaciones queden nos metros finales del corredor. A esquierda y derecha, nes paredes que zarren esti tramu final, organícense, dacuando en paneles diferenciaos, dellos caballos, una cabra y abondos signos complexos, toos grabaos. Tamién, les representaciones parciales d’un venáu y una cabra, en color negro. A lo fondero, un divertículu pequeñu y de poca altura acueye’l conxuntu figurativu mayor de la cueva, formáu por distintos temes animales, pintaos en negro y/o grabaos: caballos, cabra, bisonte y cérvidos (ente estos últimos, un gamu).
Les escavaciones arqueolóxiques feches na cueva documenten una ocupación sobre manera solutrense, con nicios tamién d’un magdaleniense inicial, coherente cola mayor parte del arte rupestre. Nelles atopóse tamién un colgante preciosu en forma de páxaru fechu sobre un diente d’osu.
El calter magrizu de les parés del Buxu favoreció la práctica del grabáu, equí abondante y de gran calidá. Amás, lo reducío de les dimensiones de la cueva dexa averar al visitante a una técnica artística acotada nes más de les cueves visitables.
Horarios:
- Zarrao llunes y martes.
- Atención telefónica: de miércoles a domingu, de 15:00 a 17:00 h.
- Ye imprescindible reserva telefónica previa.
- Teléfonu: 608 175 467
Tarifes:
- Xeneral: 3,13 €
- Reducida: 1,62 € (neños y neñes de 7 a 12 años, mayores de 65 años, Familia Numberosa y Carné Mozu).
- Al tratase d'una tasa pública del Principáu d'Asturies, les entraes tienen d'abonase n'efectivu na taquilla de la cueva.
Observaciones:
- Accesu infantil a partir de 7 años.
- Desaconséyase la visita a personas con dificultaes pa ver o movese.
- Encamiéntase usar ropa abrigao y calzáu afayadizo.
- Nun se dexa l'accesu a la cueva con animales.
Accesu:
- A 2 km de Cangues d’Onís en dirección a Panes, pela carretera AS-114, gárrase un desvíu a la esquierda que nos lleva al pueblu de Cardes, onde se garra una sienda de 1 km que lleva a la cueva d’El Buxu.