El conxuntu de la Lluera ta compuestu por dos abrigos allugaos a la vera del ríu Nalón, nes cercaníes de Priorio (Uviéu). Ye’l sitiu con arte esterior paleolíticu más importante de la rexón cantábrica.

Les representaciones gráfiques del abrigu principal o Lluera I descubriéronse en 1979 pol grupu d’espeleoloxía Polifemo y el so estudiu incluyóse dientro del proyectu d'investigaciones arqueolóxiques del Nalón mediu. Ye una covachina con planta en forma de ferradura y dos boques que conducen a dos tales galeríes paraleles, xuníes por un pasu tresversal nel so sector más fondu. La totalidá de les representaciones gráfiques de la Lluera I concéntrense nes dos parés de la galería oeste, algamando la so distribución hasta la llende de la escuridá.

La paré esquierda contién dellos paneles: un caballu aislláu grabáu na entrada y de siguío un complexu panel de grabaos confusos, ente los que s'estremen delles venaes, un uru, dos caballos y una cabra. Percima d’esti desenvuélvese un estensu dispositivu gráficu sobre una cornisa, qu'algama hasta la llinia del techu. Nel avance hacia l'interior, la paré incúrvase formando una fornica cóncava onde se conserva la composición más destacada del conxuntu: ye la llamada Gran Fornica, na que destaquen cuatro figures de uro en perfil esquierdu, que s'entamen a partir d'unes llinies de fuga oblicues suxeríes poles formes naturales de la paré. El panel complétase con delles figures de venada, espresives y dinámiques, un caballu, y a la so derecha, dos bisontes.

La paré derecha de la galería ye un complexu llaberintu de llinies estremada en trés paneles onde s’identifiquen sobre manera venaes, que van menguando en tamañu dende'l panel esterior hacia la llende de la escuridá, nun aparente trasiegu onde les figures crúciense con distinta orientación, esquierda o derecha.

El segundu abrigu del conxuntu o Lluera II identificáronlu en 1980 dos miembros del grupu d'investigación de la Lluera I. Ye una aberturina nel frente calizu, onde se grabó un conxuntu de motivos triangulares, acompañaos de, a lo menos, una venada.

La escavación arqueolóxica  de dambos abrigos confirma una ocupación paleolítica solutrense, cronoloxía arqueolóxica coherente dafechu colos criterios estilísticos del so arte, dientro de lo que se denominó segundu horizonte gráficu del Nalón. La práctica totalidá de les figures fueron grabaes con trazos fondos modelaos nel cantu, lo que da nuna destacada sensación de volumetría.

Nel arte paleolíticu esterior del Nalón destaquen sobremanera la so unidá temática, técnica y estilística, los fuertes convencionalismos y l'economía de llinies nes sos sorprendentes representaciones gráfiques.

Horarios:.

• Visites sábadu y domingu.
• Grupos reducíos. Ye imprescindible la reserva telefónica previa. 
• Atención telefónica: de miércoles a domingu, de 15:00 a 17:00 h. 
• Teléfonu: 674800385

Tarifes:

• Xeneral: 3,13 €
• Reducida: 1,62 € (neños y neñes de 7 a 12 años, mayores de 65 años, Familia Numberosa y Carné Mozu).
• Al tratase d'una tasa pública del Principáu d'Asturies, les entraes tienen d'abonase n'efectivu na taquilla de la cueva.

Observaciones:

• Accesu infantil a partir de 7 años.
• Desaconséyase la visita a persones con dificultaes pa ver o movese.
• Imprescindible usar calzáu afayadizo, zapatilles o botes de monte con suela antideslizante.
• Nun se dexa láccesu a la cueva con animales.

Accesu:

Encamiéntase l'accesu a pie dende la ilesia de San Xuan de Priorio, onde pue dexase’l coche, yá que nun hai aparcamientu disponible nes proximidaes de la cueva. Dende la ilesia hai que dirixise al caseríu de Priorio y travesar el pueblu. A la fin del mesmu un senderu descendente sobre l’ríu Nalón y paralelu al so cursu, conduz a la finca dende la que se llega a los abrigos. El trayectu peatonal dende la ilesia hasta la cueva, de 2 km, pue percorrese en malpenes 25 minutos.

Les llínees d'autobús urbanu G1 y G2 comuniquen Uviéu conla localidá de Les Caldes.